Hreyfingin mikilvæg

Gjarnan á stórafmælum líta menn um öxl yfir farinn veg og meta stoltir það sem á lífdagana hefur drifið. Það þykir þó ekki við hæfi í okkar tilfelli, þar sem að í ár fögnum við aðeins 10 ára afmæli okkar, sem þykir ekki hár aldur í starfsemi klúbbs í Kiwanishreyfingunni. En gott og vel, við lifum, og það ágætlega, sem verður að teljast bærilegur árangur í þessum harða heimi afþreyingar og ekki höfum við lent í alvarlegri tilvistarkreppu, að minnsta kosti ekki ennþá. Það má hins vegar ekki skilja orð mín þannig að klúbburinn hafi ekki unnið að góðgerðarmálum í gegnum tíðana, það hefur hann svo sannarlega gert, en í þessu greinarkorni ætla ég aðeins að leiða hugann meira að framtíðinni.

Klúbbstarfið hefur í raun og veru verið að mótast meira og minna frá stofnun klúbbsins, en eitt af markmiðum ársins er að móta formlega stefnu Höfða næstu 5 árin og hefur nefnd þegar tekið til starfa , sem skilar áliti n.k. vor.

Þá hefur klúbburinn tekið upp samstarf við Hjúkrunarheimilið Eir, en þar verður ný álma vígð 1. desember n.k., Eirarhús og ætlar klúbburinn að styðja við félagsstarfið þar í framtíðinni.

Klúbburinn hefur um árabil verið styrktaraðili Meðferðarheimilisins að Geldingarlæk, en eins og kunnugt er safnaði þjóðin á sínum tíma í beinni útsendingu fyrir heimili fyrir Vegalaus börn. Félagar hafa fjölmennt að Geldingarlæk í gegnum árin og unnið að uppbyggingu á staðnum, s.s. skógrækt, girðingarvinnu, byggingarvinnu og annað sem til hefur fallið.

Það sem framundan er, er fyrirhuguð dreifing reiðhjólahjálma í Grafarvogi að vori, en þar er um risastórt verkefni að ræða en u.þ.b 400 börn á forskólaaldri munu vera í hverfinu.

Hreyfingin er okkur í Höfða mikilvæg, ekki einungis Kiwanishreyfingin, heldur hin eiginlega hreyfing. Fyrir miðaldra Kiwanismenn þótti blak vera verðug íþrótt til ástundunar og hittast félagar einu sinni í viku og fá ærlega útrás fyrir hreyfiþörfina.

Til öflunar fjár í styrktarsjóð hefur klúbburinn flutt inn og selt flugelda um nokkurra ára skeið og orðið nokkuð ágengt. Það fylgir því hins vegar mikil vinna að undirbúa og standa í flugeldasölu, en félagar hafa engu að síður ekki látið það aftra sér þátttöku í starfinu .

Ekki veit ég hvort það ber vitni um þroskamerki klúbbsins að félagi okkar Gísli H. Árnason, mun leiða starfið í umdæminu þetta starfsárið, en hitt vitum við að þar er á ferðinni leiðtogi sem lætur sér jafn annt um hreyfinguna sem heild og hinn almenna félagsmann úti um allt land.

Okkar markmið á þessu ári hafa það að leiðarljósi að gera Kiwanis sýnilegri í hverfi okkar, sem vonandi verður til þess að stuðla að því að fleiri félagar gangi til liðs við hreyfinguna. Látum verkin tala í anda Kiwanishugsjónarinnar svo eftir verði tekið og eftirleikurinn verður auðveldur.

Brynjólfur Gíslason,
forseti Höfða

[ Til baka - Back ]