Þar sem ekki var búið að stofna umdæmi Kiwanisklúbba á Íslandi á þessum tíma voru íslenskir Kiwanisfélagar í nánum tengslum við frændur okkar á norðurlöndum. Sérstakt svæði var síðan stofnað og kallað Skandinavía-Ísland. Bjarni var valinn til að gegna hlutverki ritara og féhirði í svæðinu árið 1965-1966 og varð síðan svæðisstjóri Íslands þegar Ísland var gert að sérstöku svæði árið 1968. Árið 1970-1971 var Bjarni valinn til að vera umdæmisstjóri í umdæminu Norden-Ísland.
Árið eftir tók hann sæti í Evrópuráði Kiwanis og var síðan kosinn forseti evrópusamtaka Kiwanis 1976-1977 og sat síðan áfram sem fráfarandi forseti árið eftir. Um rúmlega tíu ára skeið tók hann þannig virkan þátt í samstarfi á vettvangi Kiwanis í Evrópu. Bjarni gekk hreint til verks og var vinsæll og hæfur leiðtogi ,hann átti létt með að vinna með fólki frá hinum ýmsu löndum í Evrópu og var vel metinn af samstarfsmönnum .
Tveimur árum eftir að Hekla var stofnuð var hafist handa um að stofna Kiwanisklúbbinn Kötlu og lagði Bjarni fram sína krafta ásamt félögum í Heklu og seinna kynntu þeir félagar hugsjónir Kiwanis fyrir mörgum öðrum ungum mönnum sem gengu til liðs við nýja klúbba sem allir unnu að þjóðþrifamálum í líknarstarfi. Kiwanishreyfingin hefur nú starfað á Íslandi í 45 ár og er óhætt að fullyrða að þeir sem hófu merkið á loft skiluðu miklum árangri.
Árið 1971 var Kiwanisklúbbinn Nes á Seltjarnarnesi stofnaður og enn var Bjarni í hópi þeirra sem lögðu hönd á plóg og varð hann fljótt einn af máttarstólpum klúbbsins. Þar starfaði Bjarni allt þar til sá klúbbur sameinaðist aftur Heklu . Eiginkona Bjarna, Ellý fylgdi manni sínum vel eftir í Kiwanisstarfinu tók virkan og mikinn þátt í að efla vináttutengsl við íslenska og erlenda félaga og eiginkonur þeirra. Þau hjón voru alla tíð reglulegir þátttakendur á þingum innanlands og utan og jafnan fylgdi þeim kátína og hressilegur andblær. Það var gaman að starfa með Bjarna, hann lá ekki á skoðunum sínum var ákafur í því sem hann taldi rétt,en það var líka allt í lagi að vera ósammála honum og deila við hann um leiðir að sameiginlegum markmiðum. Aldrei man ég eftir að hann erfði það á nokkurn hátt og mætti manni næst jafn kátur og vinsamlegur.
Í félagsskap fyrrv. Umdæmisstjóra voru þau Ellý virkir félagar . Við samstarfsfólk þeirra ,sum okkar til áratuga metum mikils allt þeirra framlag og óþrjótandi elju og trúmennsku við starf Kiwanishreyfingarinnar en umfram allt vináttu þeirra og viðmót. Bjarna B. Ásgeirssonar er minnst með virðingu og vinsemd. Við færum Ellý og fjölskyldunni allri okkar innilegustu samúðarkveður og biðjum þeim blessunar um ókomna tíð.
Fyrir hönd fyrrverandi umdæmisstjóra
Sigurður Pétursson
Ástbjörn Egilsson